HOFU: majambazi waua mhasibu waiba million 8 tu

Tabora. Mhasibu wa Kampuni ya Pamba ya mjini Tabora, ameuawa kwa kupigwa risasi kichwani na kisha baadaye wauaji kupora zaidi ya Sh8 huko Igunga.

Kamanda wa Polisi mkoani Tabora, Peter Ouma, alisema tukio hilo lilitokea usiku wa kuamkia jana.

Alimtaja mhasibu huyo kuwa ni Agnes Aron (44) na kwamba alipigwa risasi kichwani na watu wanaodhaniwa kuwa ni majambazi waliovamia ghala la pamba alilokuwamo.

Kamanda Ouma, alisema watu wanaokadiriwa kuwa watatu walivamia ghala la pamba katika Kijiji cha Iyogelo, wilayani Igunga na kumpiga risasi mhasibu huyo kwa kutumia gobori.

“Baada ya kumuua walimpekua na kuchukua kiasi cha fedha zinazokisiwa kuwa ni zaidi ya Sh8 milioni,” alisema kamanda huyo.

Alisema mhasibu huyo na wenzake walikuwa ndani ya ghala wakipokea pamba na kupakia kwenye malori.

Kwa mujibu wa kamanda, wavamizi pia waliwapekua watu wengine waliokuwa ndani ya ghala na baadaye walitoweka.

Hata hivyo alisema tayari polisi wanamshikilia mtu mmoja akihusishwa na tukio hilo.